केसांना तेल लावताना घ्या ‘ही’ काळजी, नाही तर पडेल टक्कल

काळेशार, घनदाट, लांबसडक केसांमुळे प्रत्येक महिलेच्या सौंदर्यात अधिक भर पडते. केसांचं आरोग्य राखण्यासाठी केसांना तेलानं मसाज करणं फायदेशीर असल्याचं मानलं जातं. तेलानं मसाज केल्यानं केसांचं योग्य पोषण होतं, केसांना वेगळीच चमक मिळते. केसांना तेलमसाज करण्याचे अनेक फायदे आहेत. उदाहरणार्थ कमकुवत केसांना पोषण मिळते, केसगळती नियंत्रणात येऊन केसांची चांगल्या पद्धतीनं वाढ होते. पण तेल मसाज करताना काही गोष्टींसदर्भात सावधगिरी बाळगणं आवश्यक आहे. अन्यथा फायदा होण्याऐवजी नुकसानच अधिक होण्याची भीती आहे. तेल मसाजसंदर्भात काही महत्त्वाच्या टिप्स जाणून घेऊया.

तेल हलके गरम करावे
तेल मसाजमुळे केसांचं योग्य पोषण होतं शिवाय मेंदूलाही आराम मिळतो. केसांना तेल लावण्यापूर्वी ते हलकेसे गरम करावे. गरम केलेले तेल केस तसंच टाळूपर्यंत सहजरित्या पोहोचते. ज्यामुळे केसांना चांगले फायदेही मिळतात.
(वाचा : जेवणानंतर तुम्हीही 'या' चुका करताय? शरीराचं होतंय नुकसान)

तेल गरम करण्याची पद्धत
- एका वाटीमध्ये आवश्यकतेनुसार तेल घ्यावे आणि दहा सेकंदांसाठी तेल मायक्रोव्हेवमध्ये गरम करावं.
- तेलाची वाटी गरम पाण्यामध्ये ठेवूनही तेल हलके गरम केलं जाऊ शकतं.
- तेल उकळता कामा नये. याामुळे तेलातील पोषकतत्त्वे कमी किंवा नष्ट होतात.
(वाचा : घरीच करा केसांच स्ट्रेटनिंग)

टाळू रगडून मसाज करू नये
कित्येक जण केसांना तेल लावताना टाळूवर जोर देऊन किंवा रगडून मसाज करतात. पण यामुळे केसांचं मोठ्या प्रमाणात नुकसान होते. केस तुटण्याची शक्यता अधिक असते. हातांचा जोर देऊन मसाज केल्यास केसांचा गुंता देखील होतो, एवढंच नाही तर केसांच्या मुळांचंही नुकसान होतं. त्यामुळे हलक्या हातानं केसांना मसाज करावा.
(वाचा : सावधान! घरातल्या ‘या’ 5 वस्तूंमुळे तुमच्या जिवाला आहे धोका)

तेलाच्या मिश्रणानं मसाज करा
दोन वेगवेगळ्या प्रकारच्या तेलांचं मिश्रण करून केसांचा मसाज केल्यास अधिक फायदेशीर ठरतं. नारळाचं तेल किंवा मोहरीच्या तेलात ऑलिव्ह ऑईलचे काही थेंब एकत्र करून केसांचा मसाज करू शकता. तुम्हाला आवडत असलेल्या कोणत्याही तेलांचं मिश्रण करून केसांचा मसाज करा.

केसांना बांधण्याची पद्धत
बहुतांश जण केसांना तेल मसाज केल्यानंतर केस घट्ट बांधून ठेवतात. तुम्हालाही ही सवय असल्यास वेळीच टाळा. तेल मसाज केल्यानंतर केसांच्या मुळांना नुकसान पोहोचू नये, यासाठी केस सैल बांधले पाहिजेत. मसाजनंतर लगेचच केस बांधण्याची चूक करू नका. अन्यथा केस कमकुवत होतात आणि त्याचं प्रचंड नुकसान होते.
( वाचा : स्लिम फिगर हवीय? जिऱ्याच्या सेवनामुळे वजन झटकन होईल कमी)

केसांच्या प्रकारानुसार तेलाची निवड करा
तुमचे केस निसर्गतः कोणत्या प्रकारात मोडतात, हे सर्वात आधी जाणून घ्या. उदाहरणार्थ जर तुमचे केस कोरडे-निर्जीव असतील, केसांमध्ये कोंडा असेल तर बदामाचं तेल वापरावं. नाराळाचं तेल सर्व प्रकारच्या केसांसाठी उपयुक्त आहे. कोणते तेल वापरावे, यावरून तुमच्या मनात खूप गोंधळ असल्यास डॉक्टरांचा सल्ला घ्यावा.

तेल मसाज करताना या चुका करू नका
- केवळ टाळूच नव्हे तर संपूर्ण केसांनाही तेल लावावे.
- किमान एक तास तरी केसांना तेल लावून ठेवावे. यानंतर एक टॉवेल गरम पाण्यानं ओला करा. या टॉवेल तेल लावलेल्या केसांवर गुंडाळा. यामुळे टाळूवरील त्वचेची छिद्र उघडली जातात आणि तेल सहजपणे आतपर्यंत पोहोचते.
- तेल लावल्यानंतर तासाभरानं कोमट पाण्यानं केस धुवावेत
- टाळूच्या त्वचेमध्ये नैसर्गिक स्वरुपातही तैलग्रंथी असतात, यामुळे त्वचेला ओलावा मिळतो. केसांना जास्त वेळ तेल लावून ठेवल्यास त्वचा आवश्यकतेपेक्षा जास्त तेलकट होते. यामुळे चेहऱ्यावर मुरुमे येण्याची शक्यता असते.

तेल मसाज करताना य छोट्या-छोट्या गोष्टींकडे काळजीपूर्वक लक्ष दिल्यास केसांचं आरोग्य सुधारेल.