महिलांमध्ये टीबीचे प्रमाण वाढते आहे. तरीही या आजाराविषयी म्हणावी तशी जागृती अद्याप झालेली नाही. टीबी हा अतिशय भयंकर आजार असून त्यावर कोणताच इलाज नाही, अशा भ्रमात राहणारेही अनेकजण आहेत. त्यामुळे टीबी लपवण्याचा कलही वाढत आहे.
लग्नेच्छुक तरुणींमध्ये टीबी लपवून ठेवण्याचे प्रमाण वाढते आहे. वैवाहिक आयुष्य सामान्यपणे जगता येईल का, मुलीच्या सासरी टीबी असल्याचे सांगावे का, असा प्रश्न डॅाक्टरांना हमखास विचारला जातो. लक्षात ठेवा, योग्य उपचारांनी टीबी बरा होतो.
महिलामध्ये टीबीची लागण अधिक होण्याचे कारण म्हणजे, त्यांची अतिशय कमी प्रतिकारशक्ती व पोषक आहाराचा अबाव. दर वर्षी तीस लाख महिलांमध्ये टीबी हा सुप्तावस्थेमध्ये असतो, त्यामुळे डी. ए. एल. वाय म्हणजेच डीसअॅबिलीटी अॅडजेस्टेड लाईफ इअर्सची निर्मिती होते. प्रजननक्षम वर्षात टीबी झालेल्या महिलेच्या कुटुंब आणि मुलांवरही या आजाराचा परिणाम होतो. जागतिक टीबी दिनाच्या निमित्ताने जगभरात टीबीच्या वाढत्या प्रमाणास अटकाव कसा करावा, महिलांना टीबी पासून कसे रोखावे, याविषयी चर्चा सुरू आहे. जगात टीबीचे सर्वाधिक पेशंट भारतात आढळतात, वर्षाला सुमार वीस लाख पेशंटना टीबी होतो. सुमारे ४० टक्के भारतीय लोकसंख्येला टीबीपेक्षाही त्यांच्यात सुप्तावस्थेतील टीबीचा पगडा, विशेषत्वाने महिलांना होणारी लागण, अधिक आहे. टीबीमुळे फुफ्फुसांसोबत मुत्रपिंड, हाडे, मणका, मेंदूसह शरिराच्या अन्य भागांवरही परिणाम होतो. एखाद्या महिलेस टीबीची लागण झाल्यानंतरही काही वर्ष ही लागण झाल्याचे त्यांच्या लक्षातही येत नाही. हळुहळू खंगत जाणारी प्रकृती व त्याचा आरोग्यावर होणारा परिणाम पाहता टीबी बळावल्याचे लक्षात येते.टीबीमध्ये फुफ्फुसांना होणारी लागण सर्वाधिक आहे. तीन आठवड्यापेक्षा अधिक काळ राहणारा खोकला, भूक न लागणे, वजन कमी होत जाणे, ताप, रात्री घाम येणे ही टीबीची सामान्य लक्षणे आहेत. महिलांमध्ये टीबीची लागण होऊ नये यासाठी सकस व पौष्टिक आहार गरजेचा आहे. आहारामध्ये फळे, पालेभाज्या, भरपेट नाश्ता आवश्यक आहे. ड जीवनसत्वाची पातळी तपासायला हवी, गर्दीच्या ठिकाणी चेहरा छाकून घेतल्यास टीबीची लागण होत नाही.
मोबाइल अॅप डाउनलोड करा आणि राहा अपडेट