नमिता जैन क्लिनिकल एक्सरसाइज, वेट मॅनेजमेंट अँड लाइफस्टाइल एक्सपर्ट सतत तहान लागते? खूप घाम येतो? आइस्क्रिम खावंसं वाटतंय? ही सगळी लक्षणं अगदी स्वाभाविक आहेत, कारण आता बऱ्यापैकी तापमान वाढू लागलं आहे. थोड्यात दिवसात याची तीव्रताही जाणवायला लागेल. याच घामाच्या धारांचा सामना करण्यासाठी काही शक्कल लढवायला हव्यात. घाम आल्यामुळे शरीरातील पाण्याचं प्रमाण कमी होतं. अशावेळी तब्येतीची काळजी कशी घ्यावी याविषयी... उन्हाळ्यात व्यायाम करताय? व्यायाम करण्याच्या एक तास आधी एक-दोन ग्लास पाणी प्या. व्यायाम करताना मधल्या ब्रेकमध्ये घोटघोट पाणी पित राहा. व्यायाम करून झाल्यावर लगेच पाणी पिऊ नका. मध्ये थोडा वेळ जाऊ द्या आणि मग सावकाश पाणी प्या. मनमुराद पोहा! उन्हाळ्यात पोहणं हा उत्तम व्यायामप्रकार आहे. पोहण्यामुळे स्नायूंवर कोणत्याही प्रकारचा ताण येत नाही. हा अतिशय आरामदायी प्रकार आहे. डोक्यावर ऊन असताना एकदा का पाण्यात उडी मारली, की मग बाहेर यावंसंही वाटत नाही. कधीही करा सायकलिंग जीममधली बाइक, स्पिन क्लास अथवा प्रत्यक्ष सायकल चालवणं यापैकी काहीही तुम्ही सोयीनुसार निवडू शकता. या प्रकारामुळे जास्त दमायला होत नाही आणि सर्वांगाचा व्यायामही होतो. चला, जरा चाला! ट्रेडमिलवर इनडोअर वर्कआउट करू शकता; पण बाहेर जाऊन प्रत्यक्ष चालणं अधिक फायद्याचं ठरेल. जवळच्या एखाद्या मोकळ्या फुटपाथवर, बागेत, पार्कात, समुद्रकिनारी किंवा टेकडीवर तुम्ही चालायला जाऊ शकता. शांत चित्तासाठी... - शरीर आणि मन यांचा फिटनेस राखण्यासाठी योगासनं करायला हवीत. तापमान वाढत असताना कूल राहण्यासाठी प्राणायाम नक्की करा. - उन्हाच्या वेळेत व्यायाम करणं कटाक्षानं टाळा. ऊन डोक्यावर असताना व्यायाम केल्यामुळे शरीरातील ऊर्जा कमी होते. खूप थकल्यासारखं वाटणं, उष्माघात, चक्कर येणं यासारखे त्रास होण्याची संभावना असते. - व्यायाम करण्यासाठी सकाळी लवकर उठा किंवा मग संध्याकाळच्या वेळेला पसंती द्या. - जीममधील वातानुकूलित वातावरणात व्यायाम करणार असाल, तर तुम्ही तुमच्या सोयीनुसार कोणतीही वेळ निवडू शकता. उन्हापासून मिळवा संरक्षण - वेगवेगळ्या फळांचे रस पिण्यास प्राधान्य द्या. नारळाचं पाणी हा एक उत्तम ऊर्जास्रोत आहे. - कुठंही प्रवासाला जाताना बरोबर पाण्याची बाटली ठेवा, म्हणजे थोड्याथोड्या वेळानं घोट-घोट पाणी पिता येईल. - उन्हाळ्यात भरपूर व्यायाम करत असाल, तर स्पोर्ट्स ड्रिंक्सना पर्याय नाही. शरीरातील इलेक्ट्रोलायइट्सचं संतुलन सांभाळणं खूप महत्त्वाचं आहे. - शरीराला योग्य आराम मिळतोय ना, याची खात्री करा. अतिव्यायामाचा त्रास होण्याची दाट शक्यता असते. - अतिदगदग करणं उन्हाळ्यात कटाक्षानं टाळा. या गर्मीच्या मोसमात तुमची तब्येत सांभाळणं जास्त महत्त्वाचं आहे.
मोबाइल अॅप डाउनलोड करा आणि राहा अपडेट