आधीच उन्हाने अंगाची काहिली होत असते. त्यात उन्हाळा म्हणजे तर हक्काच्या सुट्ट्यांचा महिना. त्यामुळे काहीशी शिथीलता आलेली असते. अशात व्यायाम करणं म्हणजे महाकठीण काम... तरीही हे गणित जुळवायचं कसं?
उन्हाळ्यात फिटनेसच्या दृष्टीने कोणतं ध्येय निश्चित करायला हवं ?
शरीराची भरपूर हालचाल करत राहा. उत्साही राहा. व्यायामाचा कंटाळा येणार नाही, यासाठी युक्त्या प्रयुक्त्या लढवा. पोहणं, किकबॉक्सिंग, नृत्य, अरोबिक्स अशा गोष्टींचा व्यायामात समावेश केलात की आपोआप उत्साही वाटू लागेल.
उन्हाळ्यात व्यायाम करताना कोणती काळजी घ्यायला हवी ?
व्यायामाच्या वेळी तहान लागणं ही नेहमीची तक्रार असते. सतत घाम आल्यामुळे शरीरातल्या पाण्याचं प्रमाण कमी होतं आणि तहान लागते. म्हणूनच दररोज १० ते १२ ग्लास पाणी पिणं आवश्यक आहे. तुम्ही रोज व्यायाम करत असाल तर पाण्याचं प्रमाण योग्य असायलाच हवं. व्यायामाला सुरुवात करण्यापूर्वी एक तास एक ग्लास पाणी, व्यायामादरम्यान दर पंधरा मिनिटाला एक ग्लास तर व्यायाम संपल्यावर अर्ध्या तासाने दोन ग्लास पाणी पिण्याची सवय लावून घ्या.
उन्हाळ्यात कोणते व्यायाम करणं फायदेशीर ठरू शकतं?
पोहणे - पोहणं हा उन्हाळ्यातला सर्वोत्तम व्यायाम आहे. यात कोणत्याही प्रकारचं वजन उचलावं लागत नाही. शिवाय हाडांवर कोणत्याही प्रकारचा ताण पडत नाही. उन्हाळ्यात थंडावा मिळण्याबरोबरच कॅलरी जाळण्याचं काम होत असल्याने पोहण्याचा पर्याय चांगला आहे.
सायकलिंग - सायकलिंगसुद्धा व्यायामासाठी चांगला पर्याय ठरू शकतो. हाडांच्या आणि स्नायूंच्या बळकटीसाठी सायकल चालवणं फायदेशीर ठरतं. संध्याकाळच्या वेळी सायकल चालवायला हरकत नाही. सायकलवरून ऑफिसला जाणं हाही एक छान पर्याय असेल.
चालणे - जर तुम्हाला घरच्या घरी चालायचं असेल तर ट्रेडमिल वापरून बघा. त्यामुळे घराच्या बाहेर न पडता चालण्याचा व्यायाम सहज होतो. जर तुम्हाला बाहेर जायला आवडत असेल तर रस्त्यावर, बागेत, टेकडीवर किंवा समुद्रकिनारी असं कुठेही तुम्ही चालू शकता.
योगा आणि प्राणायाम - योगासनांमुळे शरीर आणि मनाला शांती मिळते.
उन्हाळ्यात कोणता व्यायाम टाळायला हवा ?
दुपारच्या वेळी कडक उन्हात घराबाहेर व्यायाम करणं टाळा. उन्हात व्यायाम केल्याने उष्माघाताचा धोका संभवतो. यामुळे शरीरातली उर्जा निघून जाते. लगेच थकवा येतो. बाहेर व्यायाम करायचा असेल तर सकाळी लवकर किंवा संध्याकाळी सावलीत करू शकता. याला दुसरा पर्याय म्हणजे घरातच व्यायाम करण्याला प्राधान्य द्या. त्यासाठी जिमला जाऊ शकता किंवा योगवर्गातही जाऊ शकता.
मंत्र आरोग्याचा
तुमच्या आहारामध्ये फळं आणि फळांचे रस नक्कीच असू द्या. नारळपाणी पिण्याचीही सवय ठेवा.
घराबाहेर पडताना पाण्याची बाटली कायम जवळ ठेवा.
जर तुम्ही जास्त व्यायाम करत असाल तर स्पोर्ट‍्स ड्रिंक घ्यायला हवेत. एक तासापेक्षा अधिक व्यायाम होत असेल तर इलेक्ट्रोलेट घ्यायला हवं.
व्यायाम करताना योग्य वेळी विश्रांती घ्या.
उन्हाळ्यात जास्त ताकदीचे व्यायाम करणं टाळा शिवाय खूप जास्त वेळ व्यायाम करू नका.
शब्दांकन : आकांक्षा मारुलकर
मोबाइल अॅप डाउनलोड करा आणि राहा अपडेट