आधुनिक जीवनपद्धती आणि चैनीच्या विविध वस्तू उपभोगताना आपल्याला तरुण वयातच मानदुखीला व कंबरदुखीला सुरुवात होते. तासनतास कम्प्युटरसमोर बसून करावं लागणारं काम, दुचाकीचा अतिरिक्त वापर, उभं राहाण्याची व बसण्याची चुकीची पद्धत या सगळ्या चुकीच्या पद्धतीमुळे पाठदुखीला सुरुवात होते.
कारणं
स्पाँडिलायसिसः वाढत्या वयानुसार मणक्यांची झीज होते. कुर्चा (गादी) झिजण्यामुळे दोन मणक्यांमध्ये पोकळी निर्माण होऊन पाठदुखीला सुरुवात होते. मानेच्या मणक्यांची झीज झाल्यास त्याला सर्व्हायकल स्पाँडियालसिस म्हणतात. कंबरेच्या मणक्यांची झीज झाल्यास त्याला लंबर स्पाँडिलायसिस म्हणतात.
स्लिपडिस्कः दोन मणक्यांतील कुर्चा सरकते आणि बाजूच्या चेतातंतूंवर दाब येतो. यामुळे हाताच्या आणि पायाच्या बोटापर्यंत वेदना होतात आणि हातापायाला बधीरपणा येतो. दुबळे स्नायू आणि चुकीची शरीरस्थिती.
लक्षणं
मानेमध्ये किंवा कंबरेमध्ये वेदना होतात. जास्त वेळ बसल्यानंतर उठताना, चालताना, पुढे वाकताना कंबरेत कळा येतात.
कंबरेपासून पायाच्या बोटांपर्यंत बधीरपणा येतो. मांडी आणि पायाच्या मागील बाजूला वेदना होतात तसंच मानेपासून हाताच्या बोटांपर्यंत वेदना व बधीरपणा येतो.
पाठदुखी कमी करण्यासाठी फिजिओथेरपीमध्ये पुढील प्रभावी उपचार पद्धती उपलब्ध आहेत.
पाठदुखी वेदना कमी करण्यासाठीः अल्ट्रासाउंड थेरपी, इंटरफरेन्शिअल थेरपी आणि हाय व्होल्टेज थेरपी, ट्रक्शन व मॅन्युअल थेरपी यांमुळे वेदना कमी होतात.
पाठीच्या भोवतालच्या स्नायूंची शक्ती वाढवण्यासाठी थेरा बँडच्या साहाय्यानं व्यायाम आहेत.
फिजिओथेरपिस्टच्या सल्ल्यानुसार विशिष्ट प्रकारचे व्यायाम करणं गरजेचं असतं.
मोबाइल अॅप डाउनलोड करा आणि राहा अपडेट