सोरायसिस हिवाळ्यात वाढतो आणि उन्हाळ्यात कमी होतो. सूर्य प्रकाशातील अल्ट्राव्हायोलेट किरणांमुळे सोरायसिसची खाज व आग कमी होते. विशेषतः सकाळचं कोवळं ऊन सोरायसिस रुग्णांना लाभदायक ठरतं. तीव्र सूर्यप्रकाश मात्र सोरायसिससाठी हानीकारक आहे.
बऱ्याच सोरायसिस रुग्णांना सूर्य प्रकाशानं फायदा होतो. काही रुग्णांना उन्हामुळे त्रास होतो. त्यांची त्वचा सूर्य प्रकाशाला अति संवेदनशील असते. उन्हात गेल्यानं त्यांचा सोरायसिस वाढतो. ज्या रुग्णांना सूर्य प्रकाशानं फायदा होतो, त्यांनासुद्धा तीव्र सूर्य प्रकाशात जास्त राहिल्यानं त्रास होऊ शकतो.
सोरायसिसची त्वचा संवेदनशील असते. तीव्र उन्हामुळे त्वचा भाजल्यानं सोरायसिस वाढू शकतो.
सोरायसिसच्या रुग्णांनी उन्हात जाण्यापूर्वी एसपीएफ३० किंवा जास्त क्षमतेचं सनस्किन लोशन लावणं आवश्यक आहे. या लोशनमध्ये सुगंधी द्रव्य नसावीत. त्यांमुळेही सोरायसिस वाढू शकतो.
उन्हात जाताना टोपी, लांब बाह्यांचा शर्ट, सुती व सैलसर, विशेषतः पांढऱ्या रंगाचे कपडे घालावेत.
घामामुळे सोरायसिसचा त्रास वाढतो. घामात मीठ असतं. त्यामुळे खाज वाढते. सोरायसिस चेहऱ्यावर व डोक्यात असल्यास घामामुळे त्रास वाढतो.
उन्हाळ्यात सोरायसिसच्या रुग्णांनी भरपूर पाणी प्यावं.
पोहणं फायदेशीर आहे. त्यामुळे त्वचा मऊ होते व खपल्या सहज निघतात. पोहण्याच्या तलावातील क्लोरीनयुक्त पाणी मात्र अपायकारक आहे. त्यामुळे पोहोल्यानंतर स्वच्छ पाण्यानं अंघोळ करावी व शरीरावर मॉयश्चरायझर लावावं.
मोबाइल अॅप डाउनलोड करा आणि राहा अपडेट