मोड आलेल्या कडधान्यांचा सुपर फूडमध्ये समावेश होतो. कारण त्यात पोषणमूल्य जास्त असतात. त्याचं योग्य प्रमाणात सेवन केल्यास ऊर्जा मिळण्यास मदत होते. म्हणून मोड आलेली कडधान्य म्हणजेच स्प्राऊट्सचा आहारात जास्तीत जास्त समावेश करायला हवा. नाश्ता म्हणून स्प्राऊट्स चाट किंवा सलाड खाऊ शकता. स्प्राऊट्स का? सध्या करोनाशी दोन हात करण्यासाठी रोगप्रतिकारशक्ती वाढवणं गरजेचं आहे. त्यासाठी स्प्राऊट्स मदत करतात. तसंच पचनक्रिया सुरळीत पार पडण्यासाठी ज्या रसायनांची गरज असते ती मोड आलेल्या कडधान्यातून मिळतात. शिवाय कॅलरीज कमी असल्यामुळे डाएट करणाऱ्या मंडळींना याचा फायदा होतो. त्यामुळे स्प्राऊट्स खाणं सर्वार्थानं फायदेशीर असतं. फायदे काय? ० अ, ब, क आणि इ जीवनसत्वाचं स्रोत ० सहज पचन ० कॅलरीजचं कमी प्रमाण ० प्रथिनांचा स्रोत ० पोटॅशिअम, कॅल्शिअम, मॅग्नेशिअम, लोह आणि झिंक याचा योग्य प्रमाणात समावेश मोड कसे आणावेत? तुम्हाला आवडत असलेलं किंवा मिक्स कडधान्य स्वच्छ धुऊन घ्या. नंतर किमान आठ तास भिजत घाला. त्यातील पाणी काढून घ्या आणि सुती कापडात बांधून ठेवा. व्यवस्थित मोड आल्यावर निवडून त्याचा वापर करा. पर्याय काय? मोड आलेली कडधान्य शिजवून नुसती खाऊ शकता. लिंबाचा रस, कांदा-टोमॅटो-कोथिंबीर किंवा शेव घालून खाऊ शकता. चाट किंवा सलाड म्हणूनही त्याचा उपयोग होऊ शकतो. तसंच सूप, सँडविच, स्टू किंवा इतर पदार्थांमध्येही त्याचा समावेश करु शकता. अॅलर्जी असेल तर... मोड आलेल्या कडधान्यांमुळे अॅलर्जी येण्याचं प्रमाण कमी आहे. पण एखाद्याला अॅलर्जी आल्यास त्वरीत डॉक्टरांचा सल्ला घ्यावा. फ्रेश असतं बेस्ट मोड आलेली ताजी कडधान्य खावी. मोड कोरडे पडले असतील तर ते खाऊ नये. त्यामुळे अपाय होण्याची शक्यता असते.
मोबाइल अॅप डाउनलोड करा आणि राहा अपडेट