लसूण तेल : त्वचा-केसांच्या समस्यांवर रामबाण उपाय

आरोग्यासाठी पोषक अशा कित्येक गुणकारी औषधी वनस्पती आपल्या स्वयंपाकघरात असतात. यापैकीच एक म्हणजे लसूण. विविध पाककृतींची चव वाढवण्यासाठी त्यामध्ये लसूण न विसरता वापरतो. जे आरोग्यासाठी फायदेशीर देखील असतं. पण तुम्हाला माहिती आहे का लसूण तेल त्वचा, केस आणि तोंडाच्या आरोग्यासाठीही अतिशय फायदेशीर आहे. नियमित लसूण खाल्ल्यास रक्तदाब, कोलेस्ट्रोल कमी करण्यासाठी तसंच स्मृतिभ्रंशचा धोका टाळण्यासाठी मदत होते. लसूणमध्ये सल्फर नावाचं कम्पाउंड आहे, जे कर्करोगाच्या पेशी शरीरात वाढण्यापासून रोखण्याचं कार्य करतात, अशी माहिती काही संशोधनाद्वारे समोर आली आहे. यातील अँटीऑक्सिडेंट्सच्या गुणधर्मामुळे अकाली येणाऱ्या वृद्धत्वाची लक्षणं कमी होण्यास मदत होते.
लसूण आणि लसूण तेलापासून मिळणारे आरोग्यदायी लाभ
लसूण तेल कसं तयार करावं?
सामग्री:
लसूणच्या सहा पाकळ्या
अर्धा कप ऑलिव्ह ऑईल

विधि:
- लसूणच्या पाकळ्यांवरील साल काढून त्याचे बारीक तुकडे करून घ्या.
- एका मोठ्या कढईमध्ये ऑलिव्ह ऑईल घेऊन त्यामध्ये बारीक कापलेले लसूण टाकावेत बारीक कापलेले लसूण तेलामध्ये योग्य पद्धतीनं मिक्स होऊ द्यावे.
- मध्यम आचेवर लसूण-तेल काही मिनिटांसाठी गरम करत ठेवा.
- पण तेल जास्त वेळ गरम करू नका, कारण लसूण करपण्याची शक्यता आहे.
- गॅस बंद करून काही तेल थंड करून घ्या.
- यानंतर एका भांड्यामध्ये तेल गाळून घ्या आणि एका बॉटलमध्ये तेल साठवून ठेवा.
(वाचा : केसांना तेल लावताना घ्या ‘ही’ काळजी, नाही तर पडेल टक्कल)
केसगळती थांबते
लसूण तुम्ही कच्च्या स्वरुपात किंवा जेवणातून खाल्ल्यासही तुमच्या शरीराला बरेच आरोग्यदायी फायदे मिळतील. लसूण खाल्ल्यास तुमच्या केसांची चांगली वाढ देखील होते. कच्च्या लसूणमध्ये प्रचंड प्रमाणात जीवनसत्त्व आणि खनिजांचा समावेश आहे. यामध्ये व्हिटॅमिन बी 6, व्हिटॅमिन सी आणि सेलेनियमचे गुणधर्म आहेत. केसांचं आरोग्य जपण्यासाठी हे घटक पोषक आहेत. यामधील अँटी-मायक्रोबियल आणि अँटी-फंगलचे गुणधर्मामुळे टाळूवरील त्वचेचं आरोग्य चांगले राहण्यास मदत होते.
1. 2016मध्ये करण्यात आलेल्या अभ्यासानुसार, लसूणचे सेवन केल्यास केराटीनोसाइट्सचं सूर्याच्याअतिनील किरणांपासून संरक्षण होते. (Keratinocytes -त्वचेच्या बाहेर थरात आढळते ज्यास एपिडर्मिस म्हणतात). केराटीनोसाइट्स म्हणजे केराटिन तयार करणाऱ्या त्वचेच्या पेशी असतात. या पेशी त्वचेच्या सर्वात वरील थरामध्ये आढळतात. यामध्ये टाळूवरील त्वचा तसंच हेअर फॉलिकलमध्येही (केस बीजकोश) याचा समावेश असतो.

2. अ‍ॅलोपेसिया एरिटाग्रस्त (Alopecia Areata) लोकांनी टक्कल झालेल्या भागावर लसूण पेस्ट लावण्याचा प्रयोग केला होता. याचा त्यांना फायदाही झाला. लसूण पेस्ट लावल्यानं त्यांच्या केसांची चांगली वाढ होऊ लागली, अशी माहिती 2007मध्ये प्रकाशित करण्यात आलेल्या अभ्यासाद्वारे समोर आली आहे.
(Alopecia Areata - चाई पडणे म्हणजे डोक्यावर एखाद्या ठिकाणी गोलकार चट्टा पडून तेथील केस गळण्याचा आजार)
(वाचा : घरीच करा केसांच स्ट्रेटनिंग)

लसूण तेलापासून अरोमाथेरेपी घेतल्यास अ‍ॅलोपेसिया एरिटा किंवा केसगळतीच्या समस्येतून सुटका मिळण्यास मदत होते. यामुळे डोक्याच्या त्वचेतील रक्तप्रवाह सुधारतो. लसूणच्या काही पाकळ्या बारीक किसून किंवा कापून योगर्टमध्ये मिक्स करा. या मिश्रणाचा तुम्ही हेअर मास्क म्हणून वापर करू शकता.

नितळ त्‍वचेसाठी लसूण तेल लाभदायक
लसूण अर्क तसंच तेलामध्ये जखम भरून काढण्याचे गुणधर्म आहेत. लसूण तेलाचा अँटी-बायोटिक आणि अँटीसेप्टिक औषधांचा पर्याय म्हणून वापर केला जाऊ शकतो. लसूण तेलाच्या वापरामुळे त्वचेसंबंधित सर्व समस्यांतून सुटका मिळू शकते. उदाहरणार्थ : मुरुमे, सोरायसिस, संसर्ग, मुरुमांचे डाग, सुरकुत्या आणि वृद्धत्वाच्या लक्षणे कमी करण्यास मदत होते.

(वाचा : सावधान! घरातल्या ‘या’ 5 वस्तूंमुळे तुमच्या जिवाला आहे धोका)

लसूण तेलामुळे तोंडाचे आरोग्य सुधारते
लसूणमध्ये अ‍ॅलिसिन नावाचे तत्त्वे आहेत. या घटकामुळे हिरड्यांशी संबंधित रोगांशी लढायला मदतमिळते. अ‍ॅलिसिन दात किडण्यापासून रोखण्यात मदत करते. लसूण तेल आणि हळदीचं मिश्रण एकत्र करून टुथपेस्ट तयार करून घ्या. या मिश्रणानं नियमित दात स्वच्छ केल्यास दात दुखी, जिवाणू संसर्गाविरोधात लढण्यास मदत मिळते. हळदीमध्ये अँटी-मायक्रोबिअल आणि सूज न येण्याचे गुणधर्म आहेत. दिवसातून कमीतकमी दोन वेळा लसूण तेलानं दात घासल्यास हिरड्यांना आलेली सूज कमी होते.
( वाचा : स्लिम फिगर हवीय? जिऱ्याच्या सेवनामुळे वजन झटकन होईल कमी)