पाण्यामध्ये केल्या जाणाऱ्या व्यायामाला पसंती व्यायाम करायचा असेल, तर तुम्ही कुठे जाल? अर्थात जिममध्ये. पण, अनेकांची पावलं त्यासाठी वळताहेत ती स्विमिंग पूलकडे. त्यामागे कारण आहे अॅक्वा वर्कआऊटचं. फिटनेसप्रेमींमध्ये वाहवा होत असलेल्या या व्यायामप्रकारांचं वेड दिवसेंदिवस वाढत चाललंय... हर्षल मळेकर एका तासात ८०० ते १ हजार कॅलरीज खर्च करायच्या आहेत? व्यायामशाळेत अर्धा तास केलेल्या व्यायामाचे फायदे दहा मिनिटांत मिळवायचे आहेत? मग, तुमच्यासाठी आहे अॅक्वा वर्कआऊट. या अॅक्वा वर्कआऊटची सध्या खूप चलती असून, लोक मोठ्या प्रमाणावर त्याकडे वळताना दिसताहेत. साधारणपणे १९९९-२०००च्या सुमारास भारतामध्ये अॅक्वा वर्कआऊटला सुरुवात झाली होती. परंतु गेल्या सात-आठ वर्षांत या अॅक्वा वर्कआऊटची क्रेझ खूप वाढली आहे. जलतरण तलावांची वाढलेली संख्या हे यामागचं एक प्रमुख कारण असल्याचं सांगितलं जातं. पाण्यात उभं राहून केलेल्या पायांच्या विशिष्ट हालचाली, पाण्यात स्वत:चा तोल सांभाळणं तसंच खोल पाण्यामध्ये करता येणारे काही अॅडव्हान्स्ड योग प्रकार यात शिकवले जातात. 'पाण्यामध्ये उतरल्यावर तुमचं ९० टक्के वजन कमी होतं. त्यामुळे सगळ्या प्रकारच्या हालचाली तुम्ही करू शकता. गुडघा बदल शस्त्रक्रिया, पाठीच्या शस्त्रक्रिया झालेल्या रुग्णांना हे व्यायाम करणं शक्य आहे. व्यायामशाळेत अर्धा तास व्यायाम करणं हे आणि पाण्यामध्ये दहा मिनिटं व्यायाम करण्यासारखं आहे. मुंबईमधल्या वेगवेगळ्या क्लबमध्ये जाऊन मी अॅक्वा एक्सरसाइज शिकवत असते. पाण्याखाली करता येणाऱ्या व्यायामांचा एक क्रम ठरवून दिलेला असतो. त्यानुसार ते सुरू असतात. या वर्कआऊटचा शरीराला चांगला फायदा होतो', असं अॅक्वा वर्कआऊट शिकवणाऱ्या अॅक्वातज्ज्ञ दीपाली जैन सांगतात. शरीराच्या काही विशिष्ट दुखापतींमध्ये तर डॉक्टर हे वर्कआऊट करण्याचा सल्ला देतात. पाण्यात व्यायाम केल्यानं कार्डिओवॅस्क्युलर स्टॅमिना वाढतो. सांध्यांवरील ताण कमी होतो आणि तुमच्या वेदना कमी होतात, असंही तज्ज्ञांचं म्हणणं आहे. नेमकं काय? पाण्यामध्ये करण्यात येणाऱ्या वेगवेगळ्या प्रकारच्या शारीरिक हालचाली म्हणजे अॅक्वा वर्कआऊट. जलतरण तलावांमध्ये (स्विमिंग पूल) करण्यात येणाऱ्या या अॅक्वा व्यायाम प्रकारांना अॅक्वा अॅरोबिक्स, हायड्रोथेरपी, अॅक्वा योग असंही म्हटलं जातं. मुंबईतल्या बऱ्याच क्लब्जमध्ये अॅक्वा वर्कआऊट केलं जातं. पाण्यात उभं राहून हे व्यायाम केले जात असले, तरी त्यासाठी पोहता यायला हवं असं नाही. एखादी दुखापत झाली असेल किंवा अन्य काही कारणामुळे डॉक्टरांनी ज्यांना व्यायाम न करण्याचा सल्ला दिला आहे त्यांनाही हे वर्कआऊट करता येतं. याचं मुख्य कारण यामध्ये दुखापत होण्याची शक्यता जवळपास नाही, असं हे शिकवणारे तज्ज्ञ सांगतात. हे व्यायाम म्हणजे एक प्रकारे 'फन एक्सरसाइज' असल्यानं सर्व वयोगटातले लोक त्याचा आनंद घेऊ शकतात. कंबरेपर्यंत पाण्यात उभं राहून सगळे व्यायाम प्रकार यात केले जातात. व्यायामामध्ये जसा झुम्बासारखा नवीन प्रकार आलाय, तसंच म्हणता येईल. गेल्या पाच-सात वर्षांत लोकांमध्ये याचं वेड वाढलेलं आहे. या व्यायामामुळे तुमची शरीराचा तोल सांभाळण्याची क्षमता वाढते. 'फिजिकल रिहॅब'साठी याचा उपयोग होतो. विकी गोरक्ष, माजी राष्ट्रीय विजेते शरीरसौष्ठवपटू पाण्याखाली योग पाण्याखाली योगासनं कशी करायची हे देखील काही तज्ज्ञ मंडळी शिकवतात. ते शिकवणारे अरुण शिंगाडा म्हणाले, की 'पाण्याखाली योग करताना त्याचं विशिष्ट तंत्र शिकून घ्यावं लागतं. श्वास घेण्याचे, रोखून धरण्याची विशिष्ट पद्धत शिकवली जाते. त्यासाठी आपली फुफ्फुसं मजबूत व्हावी लागतात. अगदी पाण्याखाली मेडीटेशन करणंही यामध्ये शक्य आहे.'
मोबाइल अॅप डाउनलोड करा आणि राहा अपडेट