विदुला शेंडे वसिष्ठ म्हणजे उत्कृष्ट, श्रीमंत आणि सर्वांत चांगलं. वसिष्ठ हे एका सुप्रसिद्ध ऋषींचंही नाव आहे. जमिनीवरील आसनावर उभं राहावं. म्हणजे ताडासनात. दोन्ही हात डोक्याकडे वर नेऊन नंतर खाली आणत जमिनीवर पावलांशेजारी टेकवावेत (हस्तपादासन). श्वास घेत उजवा पाय मागं न्या, नंतर डावा पाय शेजारी न्या. श्वास संपूर्ण सोडा. डाव्या पावलाच्या बाहेरील बाजूस सर्व शरीराचं वजन पेलावं. श्वास घेत उजवा पाय डाव्या पायावर ठेवा. उजव्या हाताला झोका देत तो हातही उजव्या बाजूला नितंबावर आणून ठेवा. संपूर्ण धड हे उजव्या बाजूला वरील दिशेनं वळवून घ्या. यावेळी शरीराचं संपूर्ण वजन तुमच्या डाव्या हाताचा पंजा आणि डाव्या पावलाच्या बाहेरील बाजूला तोललं जाईल. असं करताना लक्षात घ्या, की डाव्या हाताचा पंजा हा डाव्या खांद्याच्या रेषेत सरळ न येता थोडासा पुढं असेल. म्हणजे डाव्या हाताचा छोटासा कोन जमिनीबरोबर तयार होईल. डाव्या हाताच्या तर्जनीवर सगळा भार देऊन डाव्या हाताच्या दंडाचे स्नायू स्थिर राहतील आणि संपूर्ण धडाचा भार पेलतील. मांड्यांमध्ये मजबूती आणत शरीराची डोक्यापासून टाचेपर्यंत पूर्ण तिरकी अवस्था होईल. श्वास घेत उजवा हात आकाशाच्या दिशेनं वर उचला आणि मान वळवत वरील दिशेकडे चेहरा वळवत दृष्टी उजव्या हाताच्या अंगठ्यावर स्थिर करा. ही आसनस्थिती अर्धा ते एक मिनिटापर्यंत स्थिर करा. सावकाश पूर्ववत येऊन दुसऱ्या बाजूनं हे आसन करावं. शारीरिक फायदे : हात, खांदे, मनगट, पोट, मांड्या, पावलं, पाय यांच्या सर्व स्नायूंना मजबूती येते. छाती ताणली जाते. पायाच्या पाठीमागची बाजू, पोटऱ्यांना मजबूती येते. मान, डोळे यांचाही व्यायाम होतो. तेथील स्नायू लवचिक, सुदृढ होतात. वैद्यकीय फायदे : शरीरावरील अतिरिक्त चरबी नष्ट होते. पोटांचे विकार म्हणजे अपचन, गॅस इ. अस्थमा, सर्व्हायकल स्पाँडिलिसिस कमी होतो. डोळे तेजस्वी होतात. शरीराची कमनियता आणि ताकद वाढते. मानसिक फायदे : हे तोलासन असल्यामुळे मनाची आणि शरीराची एकाग्रता वाढते. त्यामुळे स्मरणशक्ती वाढते. मानसिक ताण कमी होतो. कोणी करू नये : ज्यांना मनगट, खांदा, दंड, टाचा, पावलांचं तीव्र दुखणं असेल, त्यांनी हे आसन करू नये किंवा योगतज्ज्ञांच्या साहाय्यानंच करावं.
मोबाइल अॅप डाउनलोड करा आणि राहा अपडेट