ब्रेस्ट कॅन्सर हा एक गंभीर आजार आहे. त्यातील सर्व खाचाखोचा अद्याप विकसित व विकसनशील देशांनाही पूर्णतः समजलेल्या नाहीत. वयोमानामध्ये झालेली वाढ, वाढलेले शहरीकरण व पाश्चिमात्त्य जीवनशैलीचा अंगीकार यामुळे विकसनशील देशांमध्ये ब्रेस्ट कॅन्सरचे प्रमाण वाढत आहे. भारतात तिशीच्या सुरुवातीच्या वयात या कॅन्सरचे रुग्ण आढळण्याचे प्रमाण वाढू लागले आहे. वयाच्या ५०-६० वर्षांमध्ये ते सर्वात जास्त असते. एकंदर प्रत्येकी २८ महिलांपैकी एका स्त्रीला ब्रेस्ट कॅन्सर होण्याचा धोका असतो. शहरी भागांमध्ये प्रत्येकी २२ महिलांपैकी एकीला तर ग्रामीण भागामध्ये प्रत्येकी ६० महिलांपैकी एकीला ब्रेस्ट कँसर होण्याचा धोका असतो.
बहुतांश केसेसमध्ये, ब्रेस्ट कॅन्सरचे निदान उशिरा होते. त्यामुळे वैद्यकीय उपचारांचा परिणाम फारसा होत नाही. त्यामुळे रुग्णांचा मृत्यू होण्याचे प्रमाण अधिक असते. ब्रेस्ट कॅन्सरचे सुरुवातीच्या टप्प्यात निदान झाले तर रुग्ण बरा होण्याची शक्यता वाढते. वैद्यकीय निदानाच्या बाबतीत झालेली प्रगती विचारात घेता, आजाराचे निदान लवकरात लवकर करणे शक्य होते.
एकीकडे भारतात महिलांमध्ये ब्रेस्ट कॅन्सरचे प्रमाण आणि त्यामुळे होणारा मृत्यू याची संख्या देशभर वाढते आहे. तर दुसरीकडे ब्रेस्ट कॅन्सरविषयी जागृतीही वाढते आहे. परिणामी आजाराच्या सुरुवातीच्या टप्प्यात ब्रेस्ट कॅन्सरचे निदान होणाऱ्या रुग्णांची संख्या वाढली आहे. त्यामुळे आजारातून बरे होण्याची शक्यताही वाढली आहे. ब्रेस्ट कॅन्सरचे निदान करण्याचे आणि योग्य वेळेत उपचार सुरू करण्याचे अनेक पर्याय आज उपलब्ध आहेत.
TLC कानमंत्र: टच, लूक, चेक. सुरुवातीच्या टप्प्यात, ब्रेस्ट कॅन्सरची कोणतीही लक्षणे अजिबात दिसत नाहीत. त्यामुळे, स्वतःच तपासणी करणे व मॅमोग्राफी अशा स्क्रीनिंग तंत्रांचा वापर करणे आवश्यक आहे. तसेच, आजाराची लक्षणे दिसत नसली तरी नियमितपणे तपासणी करून घ्यावी. कॅन्सर झाल्याचे सूचित करणारी काही लक्षणे दिसली तर त्याकडे लक्ष ठेवावे.
सुरुवातीची काही लक्षणे पुढील असू शकतात: स्तनांमध्ये गाठ आढळणे किंवा असलेल्या गाठीचा आकार वाढल्याचे आढळणे; स्तनाग्राच्या आकारामध्ये बदल होणे, मासिक पाळीनंतरही स्तनांमध्ये वेदना कायम असणे, अकारण सूज, लालसरपणा, त्वचेची जळजळ, खाज किंवा स्तनांवर रॅश येणे, मान किंवा काखेत सूज किंवा गाठ येणे. यापैकी प्रत्येक लक्षणाची कारणे पूर्णतः वेगवेगळी असू शकतात. ही लक्षणे आढळणे म्हणजे कॅन्सर झाल्याचे अधोरेखित होत नाही. परंतु, ही लक्षणे आढळली तर ती डॉक्टरकडून तपासून घ्यावीत. एखाद्या व्यक्तीला कॅन्सर झाला आहे की नाही, हे केवळ एक प्रशिक्षित मेडिकल डॉक्टर सखोल वैद्यकीय तपासणी, मूल्यमापन केल्यावर सांगू शकेल.
ब्रेस्ट कॅन्सरमुळे मोठ्या प्रमाणात होणाऱ्या मृत्यूंचे मुख्य कारण हा आजार नसून, आजाराच्या सुरुवातीच्या टप्प्यात त्याचे निदान होण्याबाबत जागृती नसणे, हे आहे. एका म्हणीनुसार, वेळीच उपाय केल्यास जीव वाचवणे शक्य होऊ शकते. परंतु, वेळीच उपाय करण्यासाठी आजार वेळीच ओळखणे अतिशय आवश्यक आहे.
मोबाइल अॅप डाउनलोड करा आणि राहा अपडेट