अभिनेत्री श्रीदेवी यांचे शनिवारी रात्री हृदयविकाराच्या झटक्याने अकस्मात निधन झाल्याने बॉलिवूडसह तिच्या चाहत्यांना धक्का बसला आहे. इतकी फिट आणि स्लीम-ट्रीम असूनही अचानक श्रीदेवी यांचं निधन कसं काय होऊ शकतं, असा प्रश्न प्रत्येकाला पडला आहे.
महिलांना अधिक धोका
नानावटी रुग्णालयाचे हृदयरोगतज्ज्ञ डॉ. सलील शिरोडकर म्हणाले, 'हृदयविकार बहुतांश पुरुषांना होतो, हा गैरसमज आहे. वाढत्या वयानुसार महिलांमध्ये हृदयविकाराचा मृत्यूदर अधिक असतो. हृदयविकार असणाऱ्या ६० टक्क्यांहून अधिक महिलांना अकस्मात मृत्यू ओढावतो. कारण हृदयविकाराची लक्षणं पटकन दिसून येत नाहीत. म्हणूनच महिलांनी वाढत्या वयानुसार नियमित आरोग्य तपासणी करून घेणे आवश्यक आहे. यामुळे आजार उद्वभण्याचा धोकाही कमी होतो आणि उपचारांचा खर्चही कमी होतो.'
कोणत्याही वयात येऊ शकतो हार्टअटॅक
बॉम्बे हॉस्पिटलचे हृदयरोगतज्ज्ञ डॉ. अनिल शर्मा म्हणाले, 'जीवनशैली बदलल्यामुळे गेल्या काही वर्षांत ज्या आजारांत वाढ झाली आहे, त्यापैकी एक हृदयविकार आहे. हृदयविकार कोणत्याही वयात होऊ शकतो. ज्यांना हृदयाशी संबंधित कोणता अन्य विकार नाही, धुम्रपानाचं व्यसन नाही, कुटुंबात कुणाला हृदयविकाराचा इतिहास नाही त्यांनाही हृदयविकाराचा झटका येऊ शकतो. हृदयविकाराच्या तीव्र झटक्याने मृत्यू होतो, तेव्हा हृदयाची स्पंदनं थांबतात, ज्यामुळे मेंदूला ऑक्सिजन मिळत नाही आणि काही मिनिटांतच मृत्यू ओढवतो.'
मोबाइल अॅप डाउनलोड करा आणि राहा अपडेट
