भरपूर पाणी प्या ः शरीरातील पाण्याचं प्रमाण कमी झालं, की एकदम थकल्यासारखं वाटू लागतं. डिहायड्रेशनमुळे ऊर्जेवर परिणाम होतो. दम लागतो. थकवा जाणवतो. एखाद्या कामासंदर्भातला आत्मविश्वासही डळमळीत होतो. नेहमीच्याच कामातही उत्साह वाटेनासा होतो. याचा एकत्रित परिणाम अर्थातच तुमच्या ‘वर्क परफॉर्मन्स’वर होतो. हे टाळण्यासाठी किमान चार लिटर (किंवा त्यापेक्षा जास्त) पाणी रोज प्यायला हवं. तुम्ही जाणीवपूर्वक स्वतःला ‘हायड्रेट’ ठेवणं गरजेचं आहे. पाण्याचं शरीरातील प्रमाण संतुलित राखणं अत्यंत आवश्यक आहे. तर आणि तरच आपण दिवसभर उत्साही राहू शकतो आणि नकारात्मक विचारांपासून दूरसुद्धा.
प्रथिनयुक्त आहार ः तुमची ऊर्जा वाढवेल असा पोषक आहार आरोग्यदायी आयुष्यासाठी सर्वाधिक महत्त्वाचा आहे. विशेषतः सकाळी कर्बोदकं किंवा कार्बोहायड्रेट्सचं प्रमाण जास्त असलेल्या आहाराचं सेवन केलं, तर शरीरात ग्लुकोजची निर्मिती अधिक प्रमाणात होते. ब्लडशुगर प्रचंड प्रमाणात वाढते. यामुळे कंटाळा जायला मदत होते. सैलावलेल्या शरीराला पुन्हा तंदुरुस्त करण्यासाठीच रोज प्रथिनयुक्त नाश्ता करणं अत्यावश्यक आहे. तुमच्या दैनंदिन आहारात ८० टक्के भाग हा प्रथिनयुक्त आहाराचा असावा. याचमुळे संपूर्ण दिवस तुम्ही परिपूर्ण ऊर्जेनं काम करू शकाल.
स्क्रीनब्रेक घ्या ः लॅपटॉप किंवा डेस्कटॉपच्या स्क्रीनसमोर बसून अथक काम करणं हे शारीरिकदृष्ट्या दमवणारं आहे. शरीरापेक्षाही हे मनाला अधिक थकवणारं आहे. सतत स्क्रीनवर पाहिल्यानं मानसिक थकवा येतोच. याचसाठी दर एक तासानं स्क्रीनसमोरून चक्क बाजूला व्हा. डोळ्यांना थोडी विश्रांती द्या. रात्री झोपण्यापूर्वी कटाक्षानं ‘स्क्रीनलेस अवर’ पाळा. झोपण्यापूर्वी एक तास आधी टीव्ही, मोबाइल, लॅपटॉप यांपैकी कुठल्याच स्क्रीनच्या समोर डोळे आणू नका. त्यानं बहुतांश थकवा नक्की दूर होईल.
आहारात आणा हरित क्रांती ःहिरव्या पालेभाज्यांचा आहारात आवर्जून समावेश करा. पोषक आहारच तुमच्या आयुष्यात भरीव सकारात्मक बदल घडवत असतो. पालक, ब्रोकोली, मेथी, मटार अशा अनेक हिरव्या भाज्या तुम्हाला दिवसभर टवटवीत ठेवतील.
चलनवलनामुळे येईल टवटवी ः कुठल्याही प्रकारचं चलनवलन शरीरासाठी फार म्हणजे फारच गरजेचं आहे. शारीरिक आणि मानसिक तंदुरुस्तीसाठी नित्यनेमानं योगासनं करा. ताज्या वातावरणात, शांत मनानं केलेला व्यायाम तुम्हाला दिवसभर विविध आव्हानं पेलण्यासाठी तंदुरुस्त ठेवेल.
स्वतःला वेळ द्या ः तनामनाची नित्यनेमानं काळजी घेणं आवश्यक आहे. आहार, व्यायाम या सगळ्यातून ऊर्जा मिळवून अधिक कार्यक्षम आयुष्य जगा. जे करणं तुमच्याच हातात आहे.
मोबाइल अॅप डाउनलोड करा आणि राहा अपडेट