आहारतज्ज्ञानं दिलेलं डाएटचं वेळापत्रक नोकरी-व्यवसाय सांभाळताना मोठ्या मेहनतीनं पाळण्याचा अनेकांचा आग्रह असतो. मात्र, दिवसभराच्या डाएटचे डब्बे दरदिवशी घरून नेणं सगळ्यांना शक्य होतच, असं नाही. नोकरदार गृहिणींनाही इतर जबाबदाऱ्या सांभाळताना स्वतःसाठी डाएटचे पदार्थ बनवायला वेळ मिळत नाही. परिणामी, काही दिवसांतच डाएटचा फज्जा उडतो. या अडचणीवर आता 'डाएट टिफिन'च्या रूपात उत्तर मिळतंय. पुण्यात दिवसभराचा डाएट टिफिन आणि विविध प्रकारचे सॅलड मागणीनुसार नोकरी-व्यवसायाच्या ठिकाणी पोहोचवले जात आहेत. 'मॅव्हरिक मिल'चे डॉ. प्रशांत मदने म्हणाले, 'योग्य डाएट नियमित पाळणं सोपं नाही. डाएटच्या नावाखाली अनेकजण चुकीचा आहारही घेतात. वजन कमी करणारे आपल्या डाएटमधून कर्बोदकं पूर्णपणे कमी करतात. अर्थात, हे चुकीचं आहे. आम्हाला पिंपरी, वाकड, बाणेर, वानवडी आदी ठिकाणांहून आठ ते १० 'डाएट टिफिन'ची रोज मागणी असते. ब्रेकफास्ट, मिड मॉर्निंग, लंच, इव्हनिंग ब्रेकफास्ट, डिनर अशा पाच भागांत आम्ही 'डाएट टिफिन'चं विभाजन केलंय. यासाठी रोज नवा मेन्यू असून, ते बनवण्यासाठी खास शेफ ठेवलाय.' सोनिया आर्या-पतोडिया यांच्या 'गोरमेड'लाही असाच प्रतिसाद मिळतोय. रोज सकाळी घरी बनतो तसाच ताजा डबा पोहोचवण्यावर त्यांचा भर असतो. यासाठी शेफ आणि आहारतज्ज्ञाची विशेष टीम कार्यरत असून, ग्राहकांच्या गरजेनुसार सोनिया मिलचे पर्याय पुरवतात. कोट 'मॅव्हरिक मिल'च्या माध्यमातून आम्ही शरीराला रोज आवश्यक असणाऱ्या कॅलरीनुसार प्रोटीन, फॅट्स, कार्बोहायड्रेट्स आणि फायबरचे पदार्थ पोहोचवतो. याच्या प्रमाणासाठी आम्ही 'अमेरिकन कॉलेज ऑफ स्पोर्ट्‍‍स मेडिसिन'च्या मार्गदर्शक सूचना वापरतो. - डॉ. प्रशांत मदने मुख्यतः कॉर्पोरेट, फिटनेस प्रेमी आणि नोकरदार गृहिणी आमचे ग्राहक आहेत. दिवसाला आम्ही ४० हून अधिक हेल्दी टिफिन पोहोचवतो. डाएट फूड म्हणजे बिनचवीचं, कंटाळवाणं हा समज आमच्या मिलनं खोडून काढलाय. सगळ्या जीवनसत्त्वांनी युक्त असा समतोल आहार आम्ही देतो. - सोनिया आर्या पतोडिया
फिटनेस म्हणजे फक्त व्यायाम नाही, तर त्याच्या जोडीनं डाएटही महत्त्वाचं असतं. विशेष चव नसलेल्या 'डाएट फूड'चा उत्साह लवकरच मावळतो. म्हणूनच तुम्हाला घरी किंवा ऑफिसच्या ठिकाणी डाएट टिफिन म्हणून दिवसभराचं 'मिल' पुरवण्याचा ट्रेंड पुण्यात रुजतोय. यात काहीजण फक्त विविध प्रकारचे सॅलेड, ज्यूस, सूप देतात, तर काहींनी नाश्ता ते रात्रीच्या जेवणापर्यंतचा पूर्ण प्लॅनच देऊ केलाय. ही सुविधा देणारे सोशल मीडियाद्वारे आपला पाया घट्ट रोवत असून, त्याला पुण्यातल्या सगळ्या भागांतून उत्तम प्रतिसाद मिळतोय.
मोबाइल अॅप डाउनलोड करा आणि राहा अपडेट