नको उन्हाळी सामसूम!

पुणे टाइम्स टीम

उन्हाळ्याची सुरुवात झाली, की दुपारची वेळ त्रासदायक असते. त्यात ऑफिसमध्ये असणाऱ्यांना पेंगुळल्यासारखं होणं, कामात लक्ष न लागणं, उगाच दमल्यासारखं होणं वगैरे गोष्टींचा त्रास होऊ लागतो. या सगळ्याचा मानसिकतेवरही परिणाम होतो. सारंकसं सामसूम असं वाटायला लागतं. या उन्हाळी मानसिकतेवर मात करता येते. रोजचा दिवस फ्रेश आणि सुंदर होऊ शकतो.

मोगरा आणि गुलाब!

उन्हाळ्यामध्ये आपल्याला शांत आणि थंड ठेवण्यासाठी सुगंध हा महत्त्वाची भूमिका बजावतो. तुम्ही अत्तर वापरत असाल, तर या दिवसांत मोगरा आणि गुलाब अवश्य वापरा. वाळाही चांगला.

सेंट वापरत असाल, तर पारंपरिक गुलाब, मोगरा वापरा. इंपोर्टेडमध्ये अॅक्वा फ्रेग्नन्स वापरावा. यामध्ये कूल वॉटर, बर्बेरी ही उदाहरणं आहेत.

यू डी कोलन हाही उत्तम उपाय. याचे थेंब रुमालावर शिंपडा. बाहेरून आल्यावर किंवा तरतरीत वाटण्यासाठी चेहरा धुतल्यानंतर या रुमालानं पुसा. वेट टिश्यू वापरल्यासारखं वाटतं. यू डी कोलनमुळे तरतरी येते. त्याचा गंधही सुंदर असतो.

अत्तर हे मनगटाला आणि कानाच्या मागे लागावं. त्याचा खोलवर गंध घेतल्यानंतर त्याची अनुभूती मेंदूपर्यंत जाते. डोकंही शांत होतं. अत्तर वापरण्याच्या या आपल्या पारंपरिक गोष्टी आहेत. याचं आजचं रूप म्हणजे अरोमा थेरपी.

वाळा आणि मोगऱ्याची फुलं पाण्यात यासाठीच टाकतात. त्यांचा गंध असलेलं हे पाणी तजेला देतं. मोगऱ्याची तीन-चार फुलं टेबलवर ठेवली, तरी ती दिवसभर सुवास देत राहातात. मधेच कधीतरी त्यांचा खोलवर गंध घेतल्यावरही शांत वाटतं.

आजूबाजूचं वातावरण ठेवा प्रसन्न

> ऑफिसच्या खिडक्या पडद्यांनी किंवा स्लाइड्सनं झाका. मात्र, हवा खेळती राहील, याकडे लक्ष द्या. > ऑफिसच्या डेस्कवर एक छानसा फ्लॉवरपॉट ठेवता येईल. त्यामुळे वातावरण प्रसन्न राहील. > वापरात नसताना उपकरणं बंद ठेवा. त्यामुळे त्यांच्यामधून बाहेर फेकली जाणारी उष्णता कमी होईल. > बऱ्याचदा ऑफिसमध्ये जास्त लाइट्स लावलेले असतात. पुरेसा प्रकाश ठेवून अतिरिक्त लाइट्स बंद ठेवा. > तास-दीड तासानं तोंडावर पाणी मारा. त्यामुळे फ्रेश राहण्यास आणि ऊर्जा टिकवण्यास मदत होते. > डेस्कवर समोर एखादं सुखद, तजेलदार निसर्गचित्र लावून ठेवा. त्यामुळे मानसिकदृष्ट्या ताजंतवानं राहाण्यास मदत होते.

खाणं-पिणं फ्रेश

> तहान लागण्याची वाट न पाहाता पाणी पित राहावं. दिवसातून ३-४ लिटर पाणी शरीरात गेलंच पाहिजे. > कोल्डड्रिंक्स अॅसिडिक असतात, तसंच त्यामुळे तात्पुरतं बरं वाटतं; पण नंतर अजून डी-डायड्रेशन होतं. त्यामुळे कोकम सरबत, आवळा सरबत, पन्हं ही पेयं घ्यावीत. > सरबतांमध्ये सब्जा, वाळा, चंदन असे पर्याय चांगले. > कलिंगड, खरबूज, काकडी हि फळं या फळांमध्ये पाण्याचं प्रमाण भरपूर आहे. ती प्राधान्यानं खावीत. त्यामुळे व्हिटॅमिन्सही शरीरात जातात. > सुकामेवा टाळलेलाच बरा.

पेस्टल रंग देतात डोळ्यांना शांतता

> उन्हाळ्यात भडक रंग अजिबात वापरू नयेत. बाहेर उन्हाची रखरख असताना भडक रंगांमुळे नजरेला अजून रखरख जाणवते. त्यामुळे या ऋतूत पेस्टल रंगाचे कपडेच परिधान करा. > पेस्टल रंगांमध्ये लेमन यल्लो, मिंट ग्रीन, आकाशी निळा, गुलाबी, पिच, लाइट लॅव्हेंडर, ऑफ व्हाइट असे रंग येतात. या रंगांमध्ये डोळ्यांना गारवा देण्याची खासियत असल्यानं उन्हाळ्यात याच रंगांच्या कपड्यांची फॅशन 'इन' असते. > पांढरा रंग तर हवाच. पेस्टल रंगांच्या कॉम्बिनेशनसाठी पांढरा रंग उत्तम ठरतो. तो डोळ्यांना आणखी शांती देतो. > या सीझनमध्ये कॉटन फॅब्रिकच हवं. याव्यतिरिक्त लिनन, कोटा, सूपरनेट, ज्यूट आणि चंदेरीचाही पर्याय आहे. हे फॅब्रिक 'ब्रिदेबल' आणि 'प्युअर' म्हणून ओळखले जात असल्यानं घाम शोषून घेण्यासाठी त्याचा फायदा होतो.

माहिती आणि संदर्भः निवेदिता साबू, फॅशन डिझायनर, श्याम गणात्रा, अरोमालॉजिस्ट, अर्चना रायरीकर, आहारतज्ज्ञ