नमिता जैन क्लिनिकल एक्सरसाइज, लाइफस्टाइल अँड वेट मॅनेजमेंट एक्सपर्ट मोबाइल किंवा कम्प्युटर नीट काम करत नसेल, तर तुम्ही काय करता? ते उपकरण एकदा रिफ्रेश करून बघता. अगदी तसंच आपल्या शरीरालाही रिफ्रेश होण्याची गरज असते. शरीरातील हानिकारक घटक बाहेर फेकून द्यायचे आणि आरोग्याच्या दिशेनं वाटचाल करायची, हे सूत्र फायदेशीर ठरतं. शारीरिक आणि मानसिक स्वास्थ्य राखण्यासाठी आपण काय खातोय, किती व्यायाम करतोय, पुरेसा आराम घेतोय की नाही या सर्व बाबी महत्त्वाच्या ठरतात. शरीरातील टॉक्सिन्स काढून टाकण्यासाठी क्लिनझिंग डाएट करण्याचा सल्ला दिला जातो. म्हणजे पचायला हलका आहार घेणं. यामुळे शरीराची कार्यक्षमता वाढते आणि वजनही नियंत्रणात राहतं. या आहाराचे अनेक फायदे आहेत. ते पुढीलप्रमाणे... - त्वचा तजेलदार होते. - पचनशक्ती वाढते. - रोगप्रतिकारशक्ती वाढते. - शरीरात उत्साह संचारतो. शरीरातील टॉक्सिन्सचं प्रमाण वाढल्यास रोगप्रतिकारशक्ती कमी होते. अनेक लहान-मोठ्या व्याधी जडायला लागतात. शिंका येणं, सर्दी-खोकला असे आजार शरीरात घर करू लागतात. सतत दमायला होतं आणि थकल्यासारखं वाटतं. डोकेदुखी, कामात लक्ष न लागणं आणि वजन वाढणं या त्रासांना विनाकारण निमंत्रण मिळतं. सुदृढ आरोग्याचा फॉर्म्युला - दीर्घ श्वसनाचे व्यायामप्रकार शरीराला एक प्रकारची ऊर्जा देतात. यामुळे जास्तीतजास्त प्राणवायू आत येतो. - थोडावेळ डोळे मिटून शांत बसा. संपूर्ण लक्ष फक्त तुमच्या श्वासावर केंद्रित करा. - रसायनांचे फवारे मारलेली फळं आणि भाज्यांचं सेवन करणं टाळा. - व्यवस्थित पाणी प्या आणि जास्तीत जास्त तंतूमय पदार्थांचा आहारात समावेश असू द्या. - अधूनमधून स्पा थेरपी घ्या. सर्व स्नायूंना आराम देण्यास बॉडी मसाज मदत करतो. - व्यायामाचा कंटाळा करू नका. चालणं, धावणं, पोहणं यापैकी कोणताही प्रकार निवडता येईल; पण सातत्य राखणं महत्त्वाचं. - दिनक्रमाचं नीट नियोजन करा. वेळेचा सदुपयोग करा. उगाचच वेळ काढत राहिलात, तर शेवटी महत्त्वाची कामं राहून जातील. - रात्रीची शांत झोप घ्या. सहा ते दहा तास झोप शरीराला आवश्यक असते. संशोधनानुसार असं सिद्ध झालं आहे, की पुरेशी झोप न घेतल्यास आपली कार्यक्षमता कमी होते. परिणामी, शारीरिक आणि मानसिक स्वास्थ्य बिघडतं. एक दिवसीय क्लिनझिंग डाएट कसं असतं? - फळं आणि कच्च्या भाज्या खाव्या. - आठ पेले पाणी प्यावं. - चहा घ्यायचा झाल्यास औषधी चहाला प्राधान्य द्यावं. - धूम्रपान किंवा मद्यपान करणं कटाक्षानं टाळावं. - संत्र, कलिंगड, द्राक्ष, मोसंबी, अननस, सफरचंद, डाळिंब अशा ताज्या फळांचा रस काढून प्यावा. - जेवणाआधी भाज्यांचं सूप घ्यावं. बीट, काकडी, टोमॅटो, गाजर आणि मेथी या भाज्यांचा आहारात समावेश करावा.
मोबाइल अॅप डाउनलोड करा आणि राहा अपडेट