आयुष्यात नियमितपणाला अनन्यसाधारण महत्त्व आहे. व्यायामाच्या बाबतीत नियमितपणा महत्त्वाची भूमिका बजावतो. व्यायाम करण्यात सातत्य असल्यास बऱ्याच गोष्टी साध्य होऊ शकतात. सर्व वयोगटातील मंडळींसाठी व्यायाम उपयुक्त ठरतो. वय वाढत जातं तसं व्यायाम करण्यासाठी लागणारी शक्ती आणि क्षमता कमी होत जाते. पण, आरोग्य उत्तम राहण्यासाठी आपापल्या क्षमतेनुसार व्यायाम करणं अत्यंत गरजेचं आहे. नियमित व्यायाम केल्यास अनेक आजारांना दूर ठेवू शकतो, असं तज्ज्ञ आवर्जून सांगतात. पण, कोणत्या वयोगटातील व्यक्तींनी कोणत्या प्रकारचा आणि किती प्रमाणात व्यायाम करणं आवश्य आहे, असा प्रश्न अनेकांना पडतो. हे आजच्या लेखातून जाणून घेऊ या.
२० ते ३०
या वयोगटात व्यायाम करण्याची क्षमता आणि शक्ती अधिक असते. शिवाय, शरीर लवचीक असतं. त्यामुळे योग्या प्रमाणात व्यायाम करण्यासोबत संतुलित आहार घेणं आवश्यक आहे. शारीरिक क्षमतेनुसार वजन उचलल्यास व दररोज दोरीच्या उड्या मारण्याचा सल्ला तज्ज्ञ देतात. २० ते ३० वयोगटातील व्यक्तींनी स्नायूंवर योग्य प्रमाणात ताण येणारे व्यायाम करण्याचा सल्ला दिला जातो. यामुळे व्यायाम शक्ती वाढते आणि व्यायाम करण्याची क्षमतासुद्धा वाढते.
३० ते ४०
या वयात शरीरात अतिरिक्त चरबी साठवली जाते. हे आरोग्याच्या दृष्टीनं अत्यंत धोकादायक असतं. या वयात फुफ्फुसांची कार्यक्षमता मंदावते. त्यामुळे दम किंवा धाप लागते. म्हणून श्वसनासंबंधित व्यायाम करण्याची आवश्यकता असते. तसंच चालण्याचा व्यायाम करण्याचा सल्ला तज्ज्ञ देतात. हळूहळू अंतर वाढवत जा. जमेल तसं वेळ काढून किमान पंधरा मिनिटं व्यायाम करा आणि त्यात नियमितता असू द्या. याचा फायदा पुढील आयुष्यासाठी नक्कीच होईल. स्नायूंना उपयुक्त ठरतील असा आहार म्हणजेच पालेभाज्या खाणं आवश्यक असतं. अँटिऑक्सिडंट आणि प्रथिनांचं प्रमाण जास्त असणाऱ्या भाज्या खाण्यास प्राधान्य द्यावं.
५० ते ६०
या वयात हाडांची आणि स्नायूंची क्षमता कमकुवत होण्यास सुरुवात होते. या वयात तुम्ही नियमितपणे व्यायाम करत असाल तर तुम्हाला तुमच्या आणि तुमच्या वयातील इतरांमध्ये फरक प्रकर्षानं जाणवेल. नियमितपणे व्यायाम केल्यास फक्त शारीरिक नाही तर मानसिक समाधान देखील मिळतं. ५० ते ६० या वयातल्या मंडळींनी रोज दहा ते पंधरा मिनिटं व्यायाम करण्याचा सल्ला तज्ज्ञ देतात.
७० आणि त्या पुढील
सत्तरीमध्ये गुडघे आणि पाठदुखी तुमच्या दररोजच्या व्यायामाला देखील आव्हानात्मक बनवू शकतात. काही सोपे आणि साधे व्यायाम करावेत. जसं की, खुर्चीवर बसल्यावर उठताना कशाचाही आधार घेणं टाळा. यामुळे पायांच्या स्नायूंची क्षमता संतुलित राहण्यास मदत होते.
रोज व्यायाम करायला विसरू नका. तसंच व्यायाम करण्याचं दडपण देखील घेऊ नका.
संकलन- साक्षी चावरे, एस. के. सोमय्या कॉलेज
मोबाइल अॅप डाउनलोड करा आणि राहा अपडेट
