लाडू, चकली, करंजी, चिवडा, अनारसे, शेव असे अनेक पदार्थ दिवाळीच्या दिवसात खाल्ले जातात. हिवाळ्याची चाहूल लागलेली असल्यानं त्यातून मिळणारे उष्मांक शरीराला आवश्यक असतात. परंतु हे पदार्थ खाताना थोडं तारतम्य बाळगलं पाहिजे असा सल्ला आहारतज्‍ज्ञ देतात.
दिवाळीच्या दिवसांत अॅसिडीटी होणं, पोट जड होणं, अपचन अशा तक्रारी अनेकजण करतात. आहारतज्‍ज्ञ वृषाली वझे यांच्या मते, मुळात फराळ कोणत्या वेळेला करावा याबाबत जी पूर्वापार चालत आलेली प्रथा आहे ती सगळ्यांनी लक्षात घेतली पाहिजे. दिवाळीचा फराळ पहाटे आंघोळ झाल्यावर सर्वांनी एकत्र बसून, गप्पागोष्टी करत करतात. फराळाची वेळ पहाट आणि सकाळ ही असते. म्हणजे दिवसभरासाठीची ऊर्जा सकाळी पोटात घालतो. त्या क्षणी शरीराला मोठ्या प्रमाणावर ऊर्जेची गरज असते. फराळासाठी ही सर्वात योग्य वेळ.
वृषाली म्हणाल्या, की 'सकाळी फराळाचे जड पदार्थ खाऊन सहसा सुस्ती येत नाही. साहजिकच यावेळी केलेल्या फराळाचा त्रासही होत नाही. वजन, आरोग्य याबाबतीत दक्ष असणाऱ्यांनी फराळ शक्यतो सकाळी करावा. फराळाचा त्रास होऊ नये म्हणून तो घरी तयार करून खावा. घरी तयार करून खाल्ल्याने तेलाच्या, घटक पदार्थांच्या दर्जाबद्दल आपण निर्धास्त राहतो. सकाळी फराळ केल्यावर दिवसभर नेहमीचा आहार घ्यावा.' फराळाचे पदार्थ शक्यतो रात्रीच्या भरपूर खाऊ नये. हे जड पदार्थ सकाळ ते रात्र या काळात उतरत्या संख्येने खावेत असा सल्ला त्या देतात.
याशिवाय रात्री झोपण्यापूर्वी गरम पाणी पिऊन झोपावं. एका ताज्या अहवालानुसार, मिठाईचे किंवा जड पदार्थ खाताना किंवा खाल्ल्यानंतर कधीही गार पाणी पिऊ नये. गार पाण्यामुळे पदार्थामधील तेल-तूप आतड्याच्या आतल्या भागाला थिजून चिकटून बसते. यामुळे कालांतराने आतड्याच्या भिंती जाड होतात, अन्न पुढे सरकण्यास अडथळा निर्माण होतो, मग अन्न पूर्ण न पचता तसंच पुढे जातं. परिणामी त्यातले पोषक घटक शरीराला मिळत नाहीत. म्हणून मिष्टान्न किंवा पचण्यास जड पदार्थ खाताना तसेच खाल्ल्यानंतर शक्यतो गरम पाणी प्यावं.
मोबाइल अॅप डाउनलोड करा आणि राहा अपडेट
