डायबेटिस पेशंटमध्ये आढळून येणाऱ्या डायबेटिक रेटिनापथी या डोळ्यांच्या आजाराची माहिती आपण घेत आहोत. त्याची लक्षणे, चाचण्या यांची माहिती आपण मागील लेखात घेतली. या चाचण्यानंतर उपचार व आजार होऊ नये म्हणून काय काळजी घ्यावी याची माहिती लेखाच्या या भागात घेऊ या.
ऑप्टिकल कोहिअरन्स टोमोग्राफी (ओसीटी) व डोळ्यांची अँजिओग्राफी या चाचण्या केल्यानंतर या आजारावर उपचार केले जातात. सामान्य पडद्यावर रिटिना लेझर उपचार करून हा विकार दूर केला जातो. त्याचप्रमाणे डोळ्यात इंट्रा व्हिट्रिअल इंजेक्शन दिले जाते. एकदा उपचार करून हा विकार दूर होत नसल्याने सहा महिने ते वर्षभर पेशंटना लेझर आणि इंजेक्शनद्वारे उपचार घ्यावा लागतो. काही वेळा पेशंट या आजाराकडे दुर्लक्ष करतात. त्याने आजार बळावतो. अखेर डोळ्याच्या पडद्यातील रक्तवाहिन्या फूटून डोळा लाल होतो. या प्रकारात डोळ्याचा पडदा सरकल्याने काही पाहणेच अशक्य होते. याला ट्रॅक्शनल रेटिनल डिटॅचमेंट म्हणतात. यावर डोळ्यांचे ऑपरेशन हाच उपाय आहे. ऑपरेशननंतर हा पडदा पुन्हा जागेवर आणला जातो. डोळ्यात जमा झालेले रक्त ऑपरेशननंतर काढता येते. मात्र यामुळे डोळ्याला झालेली इजा किंवा अंशतः आलेले अंधत्व दूर होऊ शकत नाही.
या आजारापासून दूर राहण्यासाठी किंवा सुरवातीच्या स्टेजमध्ये तो लक्षात आल्यास त्याला अँटीऑक्सिडंट ही डोळ्यांसाठी असलेली आवश्यक औषधे दिली जातात. या जीवनसत्वांमुळे हा आजार होण्याच्या आधीच टाळता येऊ शकतो. किंवा सुरुवातीच्या स्तरावर असेल, तर तो आजार बराही होऊ शकतो.
वर्षातून दोनदा डोळ्यांची तपासणी
डायबेटिस झालेल्यांनी वर्षातून किमान एकदा तरी डोळे तपासणे आवश्यक आहे. अशा पेशंटमध्ये मोतिबिंदू वयाच्या चाळीशी किंवा पन्नाशीतच होण्याची भीती असते. त्यामुळे आजाराचे निदान वेळीच होणे गरजेचे आहे. ज्यांना हा विकार जडलेला आहे, त्यांनी तर सहा महिने किंवा तीन महिन्यांतून एकदा डोळे तपासून घेणे आवश्यक आहे. अशाने आजार बळावण्याआधीच योग्य उपचार करता येतात.
साखरेवर नियंत्रणाची गरज
डायबेटिक पेशंटनी शरीरातील साखरेवर नियंत्रण ठेवणे अत्यंत महत्त्वाचे आहे. ४०० किंवा ५००च्या वर साखरेची पातळी गेली, तरच हा आजार होईल, असे नाही तर अगदी दीडशेच्या पातळीवर साखर असलेल्यांनाही हा आजार झाल्याची उदाहरणे आहेत. तेव्हा योग्य आहार, पथ्य, चालण्याचा व्यायाम यांची सांगड घालून साखर नियंत्रणात ठेवल्यास या आजारापासून दूर राहाता येते.
मोबाइल अॅप डाउनलोड करा आणि राहा अपडेट
